BR LA UNION – Napadayawan dagiti outstanding teaching ken non-teaching personnel ditoy probinsiya ti La Union kabayatan ti programa ken seremonya a naisayangkat idi kalman, Oktubre 10 idiay Speaker Pro-Tempore Francisco I. Ortega Convention Center.
Ti nasao a pammadayaw ket panangbigbig iti napateg nga akem dagiti mangisursuro kas silaw ti edukasyon, a mangsukog kadagiti agtutubo tapno agbalin da a responsable ken nasirib nga umili a makatulong iti masakbayan ti La Union para iti panagkaykaysa ken sustainable progress.
Dagiti napadayawan ket pakaibilangan dagiti 10 Outstanding Public School Teachers, 10 Outstanding Private School Teachers, maysa a Most Outstanding Alternative Learning System (ALS) Teacher, ken 10 Outstanding Non-Teaching Personnel.
Napili ita a tawen kas Most Outstanding Alternative Learning System Teacher ni Dr. Glenny Carino Vizcarra ti Barangay Catbangen, City of San Fernando, La Union bayat a Top Awardee – Secondary Level ni Dr. Henry E. Flores ti Casilagan Integrated School – Bauang, La Union.
Timmabuno iti programa dagiti opisyales ti gobierno probinsiyal, pannakabagi manipud iti sektor ti edukasyon, ken dadduma pay a sangaili.
