35 nga ubbing ti natay bayat nga innem pay ti nasugatan kalpasan a napasamak ti stampede iti maysa a piesta iti abagatan a laud ti pagilian a Nigeria.
Inarestar dagiti otoridad ti walo a tattao nga adda pakainagan da iti insidente a napasamak iti Islamic school sadiay Ibadan City.
Karaman kadagiti natiliw ket ti sponsor iti likudan ti nadakamat nga event.
Maibasar iti imbestigasion dagiti otoridad, nangisayangkat ti Women in Need of Guidance and Support (WING) iti programa a namnamaenda a makipaset ti nasurok a 5,000 nga ubbing nga agtawen iti 13 wenno ub-ubing pay a mangabak da kadagiti premio kas iti scholarship.
Impeksa ni Nigerian President Bola Tinubu ti pannakiladingit na kadagiti pamilia dagiti biktima.
Impasiguradona nga iwayatda ti imbestigasion iti nadakamat nga insidente.
