Maibasar iti maysa a pribado a report ti United Nations a nagun-od ti Agence France-Presse, nasurok a 50 nga indibidwal iti dinukot dagiti armado a lallaki idiay Sabon Garin Damri, iti paset ti Zamfara, Nigeria.
Maipagarop a target dagiti naawagan kas “armed bandits” iti lugar idi Biyernes.
Segun iti report, daytoy iti kaunaan nga insidente ti panagdukot iti Bakura local government area ita a tawen.
Saan pay a nangibinglay ti waragawag dagiti otoridad ti Zamfara seknan iti nasao nga insidente.
Naamwan nga iti krisis ti “banditry” idiay Nigeria ket nangrugi iti nagbaetan dagiti mannalon ken agpaspastor gapo iti inagaw iti daga ken danom, ngem kimaro ken nagbalin nga organisado a krimen.
Dagiti grupo ket kumitkita iti kidnap for ransom ken panagsingir ti buwis kadagiti mannalon ken dagiti minero.
Idi napalabas a bulan, pinatay dagiti armado a grupo dagiti agarop 33 nga indibidwal a dinukot da pakairamanan dagiti tallo a maladaga idi Pebrero uray pay nakaawat dan ti ransom a $33,700.
Maipalagip nga idi 2011 ket nagsaknap dagiti armas ken riribok iti rehiyon ti Sahel a nangpapigsa kadagiti gang kadagiti sumagmamano a lugar idiay Nigeria.
Kimaro met iti kinakurang ti taraon ken napilitan nga umalis dagiti tattao kadagiti taltalon gapo iti mapadpadasan da a kinaranggas.
Idi laeng kallabes, napatay ti militar iti agarop 95 a miyembro ti maysa nga armado a grupo iti estado ti Niger, ngem agtaltalinaed nga overstretched iti pwersa ti gobierno, ken naipadamagen dagiti sumagmamano nga airstrike a nagresulta iti panakatay dagiti sumagmamano a sibilyan.
Kimaro iti sitwasyon iti panagparang ti jihadist group a Lakurawa iti rehiyon a maipagarop a nakitiponen kadagiti bandido.
Gapo iti daytoy ket napilitan dagiti gobierno ti apektado nga estado a mangala ti anti-jihadist militias tapno tumulong iti pananglaban kadagiti bandido.#
