LA UNION – Umabot iti 37 ti bilang dagiti indibidwal a na-cite in contempt idiay Kamara de Representantes ita a 19th Congress.
Kagiddan daytoy iti pannakaiturpos ti 16-person detention facility ti Kamara, iti sidong ti panangidaulo ni Speaker Ferdinand Martin G. Romualdez a pakaibaludan dagiti indibidwal a ma-cite in contempt iti naduma-duma a komite iti panangakem ti mandato.
Indaulwan da House Secretary-General Reginald “Reggie” S. Velasco ken Sergeant-at-Arms Napoleon “Nap” Taas iti inagurasyon dagiti uppat a kuwarto a pasilidad a masarakan iti Legislative Security Bureau (LSB) idi Miyerkoles.
Umaboten iti pakabuklan a 37 iti contempt order nga inruar ti Committees on Public Accounts; Public Order and Safety; Human Rights; Dangerous Drugs; Franchise; Agriculture, ken dadduma pay.
Sakbay daytoy ket awan iti permanente a detention facility iti Kamara ken agsap-sapol laeng kadagiti lugar a mabalin a pagbaludan.
Iti agdama, adda dua a nakabalud iti pasilidad— ni Daisy Quiros, maysa a real estate broker nga impabalud ti Committee on Public Accounts, ken Ronilyn Baterna, iti Corporate Secretary ti Lucky South 99 nga impabalud met ti Committee on Public Order and Safety.
Kinuna ni Taas a sakbay a naipatakder ti nasao a pasdek ket awan iti pasilidad a nakalatang a pagbaludan dagiti ma-cite in contempt.
Gaputi dayta, imbaga ni Taas a naibalud da Mayor Abundio Punzalan ken Mr. Loreto Santos, babaen ti Committee on Public Accounts idiay BJMP Facility idiay Bicutan.
Maipagarop a nalak-laka a bantayan iti baro a pasilidad, gaputa mabalinen iti uppat nga agbantay kumpara iti dati a 10 security personnel .
