BR LA UNION – Dinipensaan ni House Deputy Speaker ken La Union Rep. Paolo Ortega iti bersyon ti anti-political dynasty bill nga impasa ti kamara a ‘realistic’ ken nasayaat nga addang, a saan a naaramid ti napalabas a Kongreso.
Segun kenni Ortega, daytoy iti bersyon a maapreciar iti kaadwan a mammanday linteg.
Maikam-kamakam ti gakat a maipatungpal inton 2028 election tapno ipakita a seryoso iti tarigagay ti Kamara.
Inaklon ni Ortega nga adu ti mangbab-babalaw iti limitado a sakop ti gakat, ngem impaganetget na a dakkel a sakripisyo daytoy agsipudta dandani 80 a porsyento kadagiti miyembro ti Kamara ket naggapo iti pamilya dagiti politiko kabilang ti bukod na a pamilya ditoy La Union.
Iti sidong ti gakat, ipawil na a tumaray dagiti kabagyan agingga second degree of consanguinity or affinity (kas ti anak wenno apo) iti kapada a cluster wenno lugar a pagserserbian ti opisyal.
Inlawlawag ni Ortega a dumalan pay ti gakat idiay Senado ken bicameral conference, ken mabalin pay a mapasayaat ken baliwan daytoy.
Immunan nga imbaga ni House Majority Leader Sandro Marcos a lehitimo dagiti panangdillaw iti Anti-Political Dynasty bill ti Kamara, ngem imbaga na a ti agdama a bersyon ket resulta ti kompromiso tapno makaala ti naan-anay a suporta manipud kadagiti mammanday linteg.
