Dumanonen ti agingga 3,343 a maladaga ti naipasngay idi 2023 kadagiti inna nga agtawen laeng iti 10 agingga iti 14, segun iti panagadal ti Philippine Statistics Authority (PSA).
Immadu daytoy a bilang manipud iti 2,113 a maladaga a naipasngay kadagiti inna nga awan pay 15 ti tawenda idi 2020 idinto a 2,320 a maladaga idi 2021; ken 3,135 idi 2022.
Naibinglay daytoy iti press conference nga indauluan ti Child Rights Network (CRN) ken child rights advocates tapno awagan dagiti senador ken ni Presidente Ferdinand “Bongbong” Marcos Junior a siaannad a mangsukimat iti Senate Bill 1979 wenno ti Adolescent Pregnancy Prevention Bill.
Segun kenni Au Quilala, convenor ti Child Rights Network, suportaran koma ti gobierno ti pannakaisuro ti sex education babaen kadagiti trained professionals tapno amin nga ubbing ken agtutubo ket maikkan iti umiso nga impormasion maipapan iti komplikado a banag.
Basar iti panagadal, kinunana, ti numero uno a gubuayan ti impormasion para kadagiti agtutubo maipapan iti sex ket saan a dagiti dadakkelda no di ket ti internet, a sarunuen met dagiti gagayyemda.
