BR LA UNION – Bimmaba iti 2.03 milyon ti bilang dagiti Pilipino nga awanan ti trabaho wenno negosyo idi Agosto agdama a tawen, base iti resulta ti Labor Force Survey ti Philippine Statistics Authority (PSA).
Kaibatugan daytoy ti unemployment rate a 3.9% wenno 39 iti 1,000 indibidwal ket awanan ti trabaho wenno pagbiagan idi Agosto.
Mas nababa daytoy nu ikumpara iti 2.59 milyon a Pilipino nga awanan ti trabaho wenno negosyo idi Hulyo 2025 nga addaan kaibatugan a 5.3% unemployment rate.
Iti press conference ita nga aldaw ti Miyerkules, Oktubre 8, inlawlawag ni National Statistician ken PSA USec. Claire Dennis Mapa a maysa kadagiti makagapo ti panagbaba ti awanan trabaho idi Agosto ket iti panagsubli dagiti mangmangged a temoporaryo nga awanan panggedan idi Hulyo gapu iti serye ti bagyo a timmama ditoy pagilian.
Partikular ditoy ti industriya iti agrikultura, retail, trade ken construction.
Kabayatanna, inpadamag ti PSA chief a ti bilang dagiti indibidwal nga employed ngem agsap-sapol iti kanayunan a trabaho wenno at-atiddog nga oras iti trabaho tapno manayunan iti income da wenno underemployed ket bimmaba iti 5.38 million idi Agosto.
Dakkel met ti ngimmatuan ti employment rate idi Agosto iti 96.1% wenno kaibatugan ti 50.10 milyon a Pilipino nga addaan ti trabaho.
Base iti datos ti PSA, kadakkelan a nakatulong iti pakabuklan nga employment a 61.5% ket iti sektor ti agrikultura a 20.4% ken industriya nga 18.1%.
