BR LA UNION – Inarestar dagiti otoridad iti uppat a drug suspek iti tallo a nagsina nga operasyon dagiti otoridad ditoy siyudad ti San Fernando, idiay ili ti Rosario ken Agoo, La Union.
Iti insayangkat a buy bust operation ti San Fernando City Police Station idi kalman, Pebrero 11, ballaygi a naarestar iti dua a drug suspect a pakaibilangan ti maysa a 41-anyos a lalaki, maysa a barker iti nightclub ken iti 44-anyos a mister manipud Barangay Sevilla ken Barangay Sagayad.
Kagiddan ti pannaka-arestar da iti pannaka-kumpiskar iti nasurok kumurang pito gramo ti maipagarop a shabu nga addaan ti standard drug price a P47-k.
Idi met laeng kalman, inyanunsiyo ti Provincial Drug Enforcement Unit ti La Union Police Provincial Office ( LUPPO) iti pannaka-arestar ti maysa a 47-anyos a babai a manikurista idiay Barangay Subusub, Rosario kabayatan ti joint operation dagiti kameng ti PNP ken PDEA agents.
Kinumpiskar dagiti otoridad manipud iti manikurista iti maysa gramo ti mapapati a shabu nga agbalor ti P6,800.
Bayat nga idiay ili ti Agoo, naiditine iti 50-anyos a tricycle driver kasaruno ti pannakatiliw na iti anti-illegal drugs operation idiay Barangay Sta Rita Central.
Nakumpiskaran daytoy ti aganay 1.5 gramo ti maipagarop a shabu ken agbalor ti P10,200.
Dagiti suspek ket agpapada a sumango ti kaso nga adda pakainaiganna iti panaglabsing ti RA 9165 wenno Comprehensive Dangerous Dugs Act of 2002.
