LA UNION – Agtultuloy a dukduktalen dagiti arson investigators iti makagapu ti pannakauram ti balay a nakatayan iti uppat nga agaama idiay Barangay San Julian East, ili ti Agoo, La Union.
Binigbig iti Agoo Police dagiti natay nga isuda George Asprec, ti 74-anyos nga ama; dagiti putotna nga agnagan iti Charles Mathew Higuera, 3-anyos; Charmaine Higuera, 9-anyos; ken Charlie Jhon Higuera, 10-anyos a maipagarup a na-trapped iti maikaddua a kadsaaran ti nasao a balay.
Maipagarup a nangrugi ti uram pasado alas-7:00 itattay bigat ken nagpaot daytoy iti nasurok a maysa nga oras sakbay a nasebseban dagiti bumbero.
Madama iti imbestigasyon ti Agoo Fire Station tapno ammuen iti rason ti uram ken iti balor dagiti nadadael a sanikua.
