LA UNION -Umabuten iti tallo a nalista a bilang ti biktima iti paputok a nailista ti Ilocos Training and Regional Medical Center (ITRMC) idiay syudad ti San Fernando, La Union.
Base iti listaan ti nasao nga ospital, maysa nga 8-anyos nga ubing ti nabittakan iti boga iti rupa ngem adda itan ti natalged a kasasaad.
Agtaltalinaed met idiay ITRMC ti maysa pay nga ubing a naggapu idiay ili ti Narvacan, Ilocos Sur kalpasan a bimtak ti iggemna a putok a ‘goodbye Philippines’ isu a naglak-am daytoy iti sugat ti mata ken ima.
Gapu iti panaglibang ti iggem a ‘five star’ a paputok ket nasugatan met iti ima ti 20-anyos a lalaki nga ita ket agpapaimbag idiay ospital.
Kabayatanna, nauram met ti makinkannigid nga ima ti 16-anyos a barito kalpasan nga iniggaman ken ginangatanna ti paputok nga ‘golden spinner’.
Nataming idiay Bacnotan District Hospital ti nasao a barito.
