BR LA UNION – Inarestar dagiti otoridad ti maysa a 44-anyos a babai gaputi panagilako ti maipagarop nga iligal a droga idiay Agoo, La Union.
Natiliw ti suspek iti insayangkat a buy-bust operation ti Agoo Police Station idi malem kalman, Enero 19, idiay Barangay San Agustin East, Agoo, La Union.
Binigbig ni La Union Police Provincial Office director PCOL HERYL L BRUNO iti suspek nga alias Sopia Recafort, balasang, awanan trabaho, maibilang nga street level drug pusher, ken residente ti Bagbag, Novaliches, Quezon City.
Iti operasyon ket joint effort ti Agoo Police, PDEA, ken dadduma pay a police units.
Kinumpiskar dagiti otoridad manipud iti suspek ti maysa a plastic sachet ti maipagarop a shabu , maysa pidaso ti P500.00 buy-bust money, ken maysa a pidaso ti P500.00 boodle money.
Maibasar iti report, ti nakumpiskar nga illegal a droga ket agdagsen ti aganay 2 gramo ken mapatta-patta nga agbalor ti P13,600.
Sumangsango ti suspek iti kaso a panaglabsing iti Sections 5 ken 11 iti Comprehensive Dangerous Drugs Act of 2002.
