BR LA UNION – Natalged amin dagiti 44 nga ubbing kalpasan a paltugan ti maysa a pulis ti asawa na a mangisursuro iti maysa a kindergarten idiay Chonburi province, Thailand idi Miyerkules.
Segun kadagiti otoridad, natalged a naiyakar dagiti ubbing agraman iti tallo pay a teachers ken tallo nga school staff kalpasan ti insidente idiay Nong Pla Lai Municipal Kindergarten idiay Bang Lamung district.
Maibasar iti report ti AFP, simmangpet iti pagadalan ti suspek a maysa a pulis ken kinasarita na ti asawa na sakbay a pinaltuganna daytoy.
Saan met a naimatangan dagiti ubbing iti pammaltog agsipudta napasamak daytoy iti ruar ti classroom.
Kalpasan ti insidente, nagawid ti suspek iti balay da ken sadiay a pinalikmutan dagiti pulis ken inallokoy da a sumuko.
Kabayatanna, immandar ti gobernador iti temporaryo a pannakairikep ti kindergarten ken ipaayan ti psychological support dagiti ubbing ken staff a naapektaran ti insidente.
Saan pay a nalawag iti motibo ti pammaltog.
