BR LA UNION – Natay ti maysa a 5-year-old kindergarten pupil kalpasan a tamaan ti stray bullet iti uneg mismo ti silid-pagadalan ti Damabalas Elementary School idiay Datu Piang, Maguindanao del Sur.
Napasamak ti insidente agarop alas 8:40 ti bigat idi Miyerkoles, Pebrero 11, 2026.
Nabigbig ti biktima a ni Farhadin Ludtia, residente iti kabangibang nga ili ti Datu Salibo.
Maibasar iti report ti Datu Piang Municipal Police Station, kellaat ti pasamak ken maipagarop a dagus a natay ti biktima kalpasan a timmama ti bala ti paltog iti likod a paset ti ulo na.
Segun kenni Bangsamoro leader Datu Ali Ebrahim, naggapo ti bala iti agtultuloy a rinnupak iti asideg a lugar, partikular idiay Kudarangan, Nabalawag, Special Geographic Area (SGA) idiay BARMM.
Agtultuloy ti imbestigasyon dagiti otoridad tapno duktalen nu siasino ti rumbeng a mapagsungbat iti insidente.
