BR LA UNION – Kumpirmado a tallo a tattao iti natay bayat a mapatta-patta a 15 nga indibidwal ti nasugatan kalpasan ti napasamak a pammaltog iti baetan ti agkalaban a grupo dagiti pulitiko, idiay bisinidad ti Datu Usman Mapen Elementary School idiay Barangay Bagua 2, Cotabato City.
Ti nadara nga insidente ket napasamak itay laeng parbangon ti Setyembre 14, 2026, sumagmamano nga oras sakbay ti pormal a panagrugi iti napnuan pakasaritaan a kaunaan a Bangsamoro Parliamentary Elections.
Dua kadagiti tallo a natay ket kinumpirma a tao ni Barangay Chairman Fahad Singh. Dagiti biktima ket paset ti grupo dagiti tagasuporta ti maysa a partido a pinaltugan dagiti saan pay a nabigbig a suspek.
Sakbay ti insidente, bumisbisita wenno nangisayangkat ti panag-rekorida ti kapitan iti aglawlaw ti pagadalan tapno siguradwen nga awan ti problema iti pagnaan dagiti botante idi kellaat a timpuar ti pammaltog.
Iti agdama,mangisay-sayangkat ti nainget nga imbestigasyon iti Cotabato City Police Office tapno madetermina ti kinasiasino dagiti suspek ken motibo iti likod ti naranggas a panagatake.
Ti nasao a rehiyon a nabayagen a dinadael ti political violence iti baetan dagiti nabibileg a pamilya, ket immunan nga inkonsidera dagiti party leaders iti ballaygi ken peaceful election.
Immuna daytoy nga insidente, nailista met laeng ti maysa a pammaltog ken dua a panagbettak idi rabii idiay Barangay Rosary Heights 10, Cotabato City a nakatayan ti maysa a tao.
Gaputi dayta, umaboten ti uppat a tattao ti natay iti nagpatnag a riribok idiay Cotabato City, sakbay ti naisayangkat a Bangsamoro Autonomous Region in Muslim Mindanao (BARMM) Parliamentary Election ita nga aldaw, Setyembre 14.
