BR LA UNION – Nailista ti dua nga insidente ti panagbettak idi kalman (Setyembre 13), maysa nga aldaw wenno bisperas ti kaunaan a Bangsamoro Parliamentary Elections a nakatuding ita nga aldaw, Setyembre 14.
Segun iti Police Regional Office Bangsamoro Autonomous Region (PROBAR), maysa a tao ti naipadamag a nasugatan iti umuna nga insidente ti panagbettak, agarop alas-7:35 agingga alas-8:00 idi rabii.
Mapapati a maysa a hand grenade ti nausar iti umuna a panagbettak idiay Purok Amirol, Barangay Kalanganan.
Nabigbig ti nadunor a sibilyan a ni Zainodin Sapal Macabuat.
Ti maikadwa a panagbettak ket napasamak agarop alas-8:10 idi rabii idiay Datu Udtog Matalam area, Malagapas, Barangay Rosary Heights 10.
Dagus a nagresponde iti Cotabato City Police Station 2 ken awan ti naipadamag a natay wenno nasugatan.
Immuna ti daytoy, nailista ti nagsasaruno a kanalbuong ti paltog agarop alas-5:05 idi malem idiay Brgy. Rosary Heights 10 manipud kadagiti saan a nabigbig a lallaki a nakita a naglugan ti maysa a nangisit a minivan ken dagus a naglibas kalpasan ti insidente.
Awan ti naipadamag a nasaktan ngem nakarekober dagiti pulis ti pito a basyo ti bala.
Nupay nangparnuay ti panagbuteng kadagiti residente ti panagbettak, siniguro ni Cotabato City Mayor Mohamad Ali Matabalao nga agtalinaed a kontrolado ti militar ken pulisya iti seguridad para iti maisangkat a Bangsamoro Autonomous Region in Muslim Mindanao (BARMM) Parliamentary Election ita nga aldaw.
Iti agdama, agtultuloy ti imbestigasyon ti Crime Scene Examination Unit (CECU) tapno madetermina ti motibo ken nu adda pakainaiganna daytoy iti eleksiyon.
