BR LA UNION – Maipagarop nga ilung-lungalong ti U.S., Iran, ken grupo dagiti regional mediators iti termino para iti posible nga 45-aldaw a ceasefire, a mabalin a manglukat iti dalan para iti permanente a panagpatingga ti gubat, segun iti report idi Lunes (oras ditoy Pilipinas).
Maibasar iti impormasyon manipud iti uppat nga impormante manipud Estados Unidos, Israel, ken rehion nga addaan pannakaammo iti saritaan, pagtu-tungtongan dagiti mediators dagiti kondisyon para iti maysa a two-phased deal.
Iti umuna a paset, sakop ti posible nga 45 nga aldaw a tigil-putukan, bayat a ti maikadua a paset ket naipamaysa iti permanente a pannakarisut ti gubat.
Mabalin a mapaway-wayan ti ceasefire no kasapulan ti kanayonan nga aldaw tapno maituloy ti negosasyon, maibasar iti report.
Segun iti White House, saan pay nga inaprubaran ni U.S. President Donald Trump ti naisingasing nga 45-aldaw a ceasefire.
Nagkedked met ti Iran nga umanamong iti ceasefire, kalpasan a kinuna ni Iranian Foreign Minister Esmaeil Baghaei nga adda bukodna a sungbat kadagiti kiddaw ti US a “gibusan ti gubat” ken pinagkedkedanna dagiti ultimatum ti Estados Unidos.
Ti nasao a proposal ket indatag ti sumagmamano a pagilian kas paset ti agtultuloy a panagregget a mangkissay ti tension iti tengnga ti agtultuloy a riribok iti rehion. Tarigagay daytoy nga ipatungpal ti temporaryo a ceasefire bayat a maitantandudo ti nalawlawa a saritaan kappia.
Kabayatanna, imbaga ni Trump iti Wall Street Journal idi Domingo nga intudingna ti deadline agingga rabii ti Martes para iti Iran a lukatan iti Strait of Hormuz, ken nagpakdaar a nu saan a masurot, mabalin a rauten ti Estados Unidos ti kritikal nga imprastruktura ti pagilian.
