Imbilin ti Malacañang idi kalman Domingo, Nobiembre 22, 2026, ti beripikasyon kadagiti maipagarup a thumbmark ti sumagmamano a kameng ti Aeta indigenous community kadagiti dokumento a mainaig iti Pax Silica Initiative nga idauluan ti Estados Unidos.
Segun kenni Palace Press Officer ken Presidential Communications Office Undersecretary Claire Castro, nasken a masigurado no pudno dagiti dokumento ken no maawatan dagiti mapapati a nagpirma ti linaon dagitoy.
Kinuna ni Castro nga imbestigaran ni Bases Conversion and Development Authority (BCDA) President ken CEO Ariel Nepomuceno ti kinapudno dagiti dokumento a mapapati a naglaon iti thumbmark. Impaganetgetna pay a saan nga ipalubos ni Presidente Ferdinand Marcos Jr. a mabalin a magundawayan wenno maikabil iti dehado ti asinoman a Pilipino gapu iti transaksion ti gobierno.
Nangrugi ti kontrobersiya kalpasan a naipadamag a sumagmamano nga Aeta iti Barangay O’Donnell, Capas, Tarlac ti mapapati a nangikabil iti thumbmarks-da kadagiti dokumento a maawawagan iti quitclaims a mainaig iti nasao a proyekto.
Nakailanad iti maysa kadagiti dokumento a dagiti nagpirma ket saan a pudno nga akinkukua kadagiti daga a taltalonenda ken bigbigenda a kukua daytoy ti gobierno. nakailanad pay ditoy a nakaawatda ti mapapati a ₱30,000 a tulong pinansial.
Kabayatanna, kinuna ti maysa a lider ti tribu dagiti Aeta a pinagkedkedan ti komunidad ti alok ti BCDA a ₱30 iti kada metro kuadrado para iti dagada. Saan pay a nalawag no kasano a mainaig daytoy iti ₱30,000 a pinansial a tulong a nakailanad kadagiti dokumento.
Pagamkan dagiti katutubo ken mannalon a mapukawanda ti daga ken pagbiagan no bilang matuloy ti pannakaibangon ti high-tech manufacturing ken semiconductor hub idiay New Clark City, Tarlac.
Nagpanawagan pay dagiti organisasion ti pannakasigurado ti pannakaraem dagiti karbengan dagiti umili iti nasao a lugar, pakairamanan ti Free, Prior and Informed Consent wenno FPIC-da.
Iti laksid daytoy, impaganetget ni Marcos a saan nga umatras ti Pilipinas iti Pax Silica Initiative gapu ta makitana a gundaway daytoy ti pagilian a makipaset iti sangalubongan nga industria ti artificial intelligence ken moderno a teknolohia.
Nupay kasta, inlawlawagna a saan pay a nagpirma ti Pilipinas ken Estados Unidos iti pinal a katulagan.
Panggep ti Pax Silica a papigsaen ti sangalubongan a supply chain para iti silicon, napapateg a mineral, semiconductor ken imprastruktura ti artificial intelligence ken nu kasatnu nga agnumar ti pagilian iti daytoy a proyekto.
Iti agdama , maur-uray ti resulta ti BCDA verification tapno maammuan no pudno, maawatan ken boluntario nga inadaptar dagiti maseknan dagiti dokumento a mainaig iti proyekto.










