BR LA UNION – Inbutaktak ni Atty. Raymond Fortun nga adu pay a senador iti posible a mainaganan iti sumaganad nga aldaw, a maipagarop a karaman iti kontrobersiya dagiti flood control projects idiay Bulacan.
Segun kenni Fortun, nga agserserbi a legal counsel ni sigud a Bulacan 1st District Engineering Asst. Chief Brice Hernandez, naamiris na iti sumagmamano a sensitibo a dokumento nga iggem ti kliyente na, a naglaun iti impormasyon seknan iti nalawa a network ti korupsyon dagiti flood control projects iti nasao a probinsya.
Kabilang ditoy ti nagan dagiti innem a senador, uppat iti nakatugaw (incumbent) ken dua ti awanen iti serbisyo.
Immunan a nairaman ti nagan da Sen. Jingoy Estrada ken Sen. Joel Villanueva iti immuna a hearing ti Senado seknan iti flood control anomaly.
Ngem iti testimoniya ni sigud a District Engineer Henry Alcantara, nadakamat na iti nagan ni sigud a Sen. Ramon ‘Bong’ Revilla.
Iti biang dagiti kongresista, malaksid kada Rep. Zaldy Co ken dadduma pay nga immunan a nainaganan, adda pay ti sumagmamano kunana a saan pay a naibutatak ngem agpapada dagitoy a nakaragpin kadagiti dokumento nga iggem ni Hernandez.
Dagiti nasao a dokumento, segun kenni Atty. Fortun, ket maiyawat iti Independent Commission on Infrastructure ken idiay Senado, tapno agserbi nga ebidensiya iti imbestigasyon ken panangidatag ti kaso.
Imbaga pay ti abogado, dagitoy a dokumento ket manipud iti maysa laeng a distrito idiay Bulacan a sakop iti opisina ni Hernandez ken saan pay a karaman dagiti flood control projects iti intero a pagilian, a mabalin a pagnum-numaran ti dadduma pay a mammanday linteg, babaen ti kickback system .
