BR LA UNION – Kinumpirma ti Ministry of Interior Qatar nga innem a tattao ti natay kalpasan a nagsuwek ti maysa a helicopter iti territorial waters idiay Qatar.
Segun kadagiti otoridad, innem kadagiti pito a nakalugan ti helicopter ket narekobren ti bangkay babaen ti search and rescue team, bayat nga agtultuloy ti operasyon tapno sapolen ti maysa pay a mapukpukaw.
Immunan nga imbaga ti Ministry Defense of Qatar a posible a nakapasar ti teknikal nga aberya iti helicopter ken nailawlawag nga awan ti maipagarop a panagraut ditoy ken saan pay a sigurado nu ti nagsuwek nga aircraft ket kukua ti militar wenno pribado nga indibidwal.
Kabayatanna, daytoy ti umuna a gundaway nga adda naipadamag nga aviation-related nga insidente idiay Qatar iti tengnga ti agdama ken agtultuloy a riribok idiay Middle East.
Agtultuloy ti imbestigasyon iti insidente bayat a maur-uray ti kanayunan a detalye kadagiti otoridad.
