Nagsinnukat ti kabaruan nga opensiba ti Estados Unidos ken Iran bayat nga ipagpaganetget iti impluwensia-da iti Strait of Hormuz, maysa kadagiti kapatgan a ruta para iti sangalubongan a suplay ti lana.
Segun ti US Central Command (CENTCOM), rinugyan daytoy iti maikatlo a nagsaruno a rabii ti airstrikes kontra ti Iran agarup alas-4:45 ti malem Eastern Time (2045 GMT) idi Lunes. Kenuna ti militar ti Estados Unidos a panggep ti operasion a pakapsuten iti kabaelan ti Iran nga umatake kadagiti sibilyan ken komersial a lugan pangbaybay iti Strait of Hormuz.
Inpadamag met dagiti state media ti Iran iti serye ti panagbettak iti makinabagatan a paset ti pagilian, karaman ti Bandar Abbas, dagiti isla ti Kish ken Qeshm, ken idiay Jam, Bushehr. Segun ti Fars News Agency, awan ti pimmusay iti maysa a projectile a timmama iti laud a paset ti Bandar Abbas.
Kabayatanna, inbaga ti Tasnim News Agency a pinuntirya ti puersa ti Iran dagiti sumagmamano a barko a maipagarup a naglabsing iti pammilin da iti Strait of Hormuz ken napagsuwek ti maysa a drone a manipud Estados Unidos asideg ti Bandar Abbas. Saan pay a nakumpirma daytoy dagiti independiente nga otoridad.
Pinasingkedan met ti United Arab Emirates (UAE) a natiruan ti Iranian cruise missiles dagiti dua nga oil tanker daytoy iti kabaybayan a sakupen ti Oman iti Strait of Hormuz. Maysa nga Indian crew ti pimmusay ken walo pay dagiti nasugatan.
Kenuna ti Islamic Revolutionary Guard Corps (IRGC) a palawaen daytoy dagiti retaliatory attacks kontra kadagiti kaalyado ken interes ti Estados Unidos iti rehion. Inbatad met ti Iranian military a nangisayangkat da ti drone attack kontra kadagiti target ti US idiay Kuwait, karaman ti Patriot missile system, fuel tanks, watchtower, ammunition depot ken communication systems. Immuna met nga inpadamag ti Iran dagiti panagatake idiay Bahrain, Jordan ken Kuwait.
Idi Hulio 10, pormal nga inpakaammo ni President Donald Trump iti Kongreso a timpuar manen iti rinnupak idi Hulio 7, ken inusar iti bileg-na tapno mapagtalinaed dagiti puersa ti Estados Unidos iti uneg ti kanayunan a 60 nga aldaw a saan nga agkasapulan ti dagos a panagaproba ti Kongreso.
Inpadamag met ti Estados Unidos iti panangipatungpal manen ti naval blockade kontra iti Iran, a naikeddeng a mangrugi iti alas-8:00 ti rabii GMT, aldaw ti Martes. Segun ti Joint Maritime Information Centre (JMIC), sakupen daytoy iti sapasap a makinabagatan a paset ti kabaybayan ti Iran, karaman dagiti sangladan ken oil terminal. Mapalubusan a dumalan dagiti barko a saan nga agturong idiay Iran ken dagiti humanitarian shipment kalpasan a mainspeksion, ngem mabalin a maharang dagiti barko a mapapati a tumultulong iti panangliklik iti blockade.
Agtultuloy met iti panagsinnukat ti waragawag dagiti dua a pagilian seknan iti kontrol iti Strait of Hormuz. Inpaganetget ni Trump nga agtaltalinaed a silulukat iti ruta pangbaybay ken inpadamag iti plano a 2-% toll kadagiti kargamento a dumalan ditoy kasukat ti proteksion nga ited ti Estados Unidos. Kinontra met daytoy ni Iranian Foreign Minister Abbas Araghchi, a nangibaga a ti Iran iti nabayagen a mangmanmanehar ti nasao a dalan.
Iti laksid ti agtultuloy nga opensiba, kenuna ni Trump nga agtaltalinaed a posible ti katulagan iti Iran. Segun ti White House, silulukat iti posibilidad ti negosasion uray agtultuloy iti rinnupak.
Gapu iti kumarkaro a tension, ngimmato ti nasurok 9% iti presion ti Brent crude oil iti nasurok-kumurang US$81 kada bariles. Inreport met ti ship-tracking firm a Kpler a bimmaba ti dandani 52% iti kaado dagiti barko a dumaldalan iti Strait of Hormuz maiyarig iti napalabas a lawas.###
