BR LA UNION – Pakabuklan a 7,320 drivers a miyembro ti Tricycle Operators and Drivers Association iti nakatuding nga umawat ti PHP5,000 cash relief assistance manipud Department of Social Welfare and Development (DSWD), iti maisayangkat a payout kadagiti walo nga ili iti naduma-duma a paset ti Rehiyon Uno ita nga aldaw ti Huwebes, April 16, 2026.
Manipud iti nasao a bilang dagiti beneficiaries, 166 a TODA drivers ti umawat idiay Burgos, Ilocos Norte; 1,177 idiay Naguilian, La Union; 862 idiay Manaoag; 1,396 idiay Mangaldan; 968 idiay San Fabian; 499 idiay San Jacinto; 1,210 idiay Binalonan, Pangasinan; ken 1,042 idiay Asingan, Pangasinan.
Tarigagay ti ahensiya nga agbalin a nannayas ken naurnos iti panag-claim ti Cash Relief Assistance (CRA), isunga siguradwen dagiti benipisyaryo nga ammo ti payout site ken suroten ti nagbalin nga abiso ti lokal a gobiyerno.
Impalagip ti ahensiya a makaawat ti opisyal nga abiso manipud lokal a gobyerno dagiti kuwalipikado a TODA drivers nga umawat ti ayuda.
Nakailanad metten iti iskedyul ken kasapolan nga itugot iti panag-claim.
Dagiti laeng adda iti masterlist ti mapalubosan nga agturong iti payout site ken saan a mabalin ti walk-in registration.
Ti listaan nga iggem ti DSWD ket insumite dagiti opisyal ti TODA iti LGU.
Nu saan a nairaman iti listaan, mabalin ti maki-koordinar iti TODA officers ken iti lokal a gobyerno.
Immunan a nangipaay ti DSWD Field Office 1 – Ilocos Region (DSWD FO 1) iti payout ti Cash Relief Assistance (CRA) iti sidong ti Assistance to Individuals in Crisis Situation (AICS) kadagiti kangrunaan a siyudad ditoy San Fernando, La Union, idiay Ilocos Sur, ken Ilocos Norte para kadagiti PUV drivers idi Abril 8, 2026.
Ti tulong ket nairanta tapno mapalag-an ti bak-baklayen a rigat manipud iti epekto ti dakkel a ngimmatuan iti presyo dagiti produkto petrolyo partikular iti biang dagiti public utility vehicle drivers.
