Pinaulogan ti National Police Commission ti 90-day preventive suspension ni sigud a Criminal Investigation and Detection Group Director Police Brigadier General Romeo Macapaz Junior.
Nakitaan ti NAPOLCOM ti natibker a basaran ti reklamo nga impila ni Elakim Patidongan iti hanay da mainaig ti imbestigasyon nu kasatno da a naarestar ken naiyawid ditoy Pilipinas manipud pagilian a Cambodia.
Inlawlawag ni NAPOLCOM vice chairperson ken executive officer Commissioner Rafael Vicente Calinisan a daitoy ket saan a pannusa nu di ket maysa laeng a preventive measure ti komisyon tapno maliklikan a malaokan ti agdama da nga ebidensya ken waragawag kontra kenni Macapaz.
Kinuna ti komisyon a ti suspensyon ni Macapaz ket tapno maiturong isuna idiay Kampo Crame kabayatan iti proseso ken sadiay a pagsungbaten kadagiti alegasyon kontra kenkuana.
Inlawlawag met ti opisyal a makaawat laeng ti pannusa ni Macapaz nu malpasen ti deliberasyon ti komisyon para ti maysa nga NAPOLCOM en banc ken agtultuloy latta a masirip dagiti ebidensiya.
Nakatuding a sumango manen ti deliberasyon ti dasig ni Elakim Patidongan ken ni Macapaz sakbay iti pinal a panagkeddeng ti komisyon.
Iti agdama ket temporario paylaeng nga agnaed ni Macapaz ti maysa a holding unit idiay Crame iti uneg ti tallo a bulan nu kasta ket mapagtalinaed ti komisyon ti integridad ti isaysayangkat da nga imbestigasyon.
Maipalagip a nangipila dagiti agkabsat a Patidongan ti reklamo kontra kenni Macapaz kalpasan a kumpiskaren na dagiti personal a cellphones da a naglaon kadagiti ebidensiya nga importante para ti panagrang-ay ti kaso dagiti mapukpukaw a mammallot.
Kabayatanna, nakatuding met a sumungbat ti kampo ni Macapa idiay mismo NAPOLCOM tapno paglibakan wenno ilawlawag iti dasig na kontra kadagiti akusasyon ti agkabsat.
