LA UNION – Mangnamnama iti naulila a pamilya ni sigud a La Union Congressman Eufranio Eriguel a saan nga agbaybay-a ti pulisya iti imbestigasyon tapno maited ti hustisiya iti pannakatay daytoy ken iti tallo pay a kakadwa na.
Iti interview ti Bombo Radyo kenni Atty. Cherrie Untalan, chief of staff ni La Union Representative Sandra Eriguel, kinuna na nga arigna binaybayan idi ti pulisya iti napapatay a sigud a mammanday linteg gaputi saan a panangpabus-oy iti kadawatan daytoy a maipaayan ti seguridad.
Inlawlawag pay ni Untalan, nga impeksa laeng ni Rep. Sandra iti privilege speech na idiay kongreso iti panagkurang dagiti opisyal ti pulisya sakbay iti nakaam-ames nga insidente.
Saan met a kaipapanan daytoy kunana, a napukawen ti kumpiyansa da iti pulisya ngem ketdi impaganetget na a sibubukel latta iti talek da iti maisay-sayangkat nga imbestigasyon.
Maipagarop a mamati iti pamilya Eriguel a nu arigna ket naaddaan ti dackel a panagkurang ti pulisiya idi, ita ket saan da a baybay-an iti kaso agingga a magun-od iti tar-tarigagayan da a hustisiya.
Immuna ti daytoy, iti privilege speech ni Rep. Sandra idiay Kongreso ket saan na a nailemmeng ti sakit ti nakem ken panangbabalaw na iti sumagmamano nga opisyal ti pulisya maipapan iti panangpatay ti asawa na a ni sigud a Congressman Eufranio Eriguel.
