LA UNION – Kinumpirma ti Center for Health Protection ti Hong Kong (HK) Health Department a nakailistada iti 47 dengue cases a nagtaud manipud iti kabangibang a pagilyan ti Abagatan a Daya ti Asya.
Base iti report ti HK Health Department, manipud iti nasao a bilang ket 21 a kaso iti nagtaud manipud idiay Thailand, siyam iti Pilipinas, ken innem met ti naggapu idiay Cambodia.
Gapu iti daytoy, nagpalagip ti health department kadagiti umili sadiay no agbiyahe idiay ballasiw-taaw ken nasken nga agannad dagitoy tapno saan a makaptan ti aniaman a sakit kas iti dengue fever.
Nabagbagaan metten dagiti residente nga ikkaten wenno dadaelen dagiti banag a pagumukan iti lamok ken kasapulan a maaddaan met dagitoy iti personal protective measures kas iti panagkawes ti light-coloured long-sleeve a bado wenno panagaramat ti insect repellent iti bagi kontra ti lamok.
Kabayatanna, kinuna met iti Bombo Radyo ni Eden Pillo, tubong iti probinsya ti La Union nga ita ket agtrabtrabaho idiay HK a natalgedda gapu ta imported met iti kaso ti dengue sadiay.
Saanen a makaakar sigun kenkuana ti dengue basta lumiklik wenno saan a makagat ti lamok.
“Saan met a makaakar ti dengue, unless no nakagatka iti lamok. Pagyamanan, safe pay met gapu ta imported gayam iti dengue cases ditoy”, sigun kenni Pillo.
