(Update)LA UNION – Kinumpirma ti La Union Police Provincial Office (LUPPO) a maipagarup a kameng iti robbery ken gun for hire group ti maatap a drug pusher a napapatay dagiti pulis iti naisayangkat a buy bust operation idiay Barangay Baroro, ili ti Bacnotan, La Union.
Iti pannakiuman ti Bombo Radyo kenni S/Supt. Ricardo Layug Jr., provincial director ti LUPPO, kinunana a miyembro ti Ramos gun for hire group ti napapatay a drug suspect a ni Rodante Acosta ti Santol, La Union.
Sigun kenni Layug, ni Acosta ket maipagarup a maysa kadagiti suspek a nangpapatay kenni Reynard Mostales a kameng met ti nasao a grupo idi napalabas a bulan ti Hulyo idiay ili ti Santol ken ‘love triangel’ met ti makitkita a motibo.
Maipalagip a ni Mostales ket maipagarup a maysa kadagiti suspek a nagpapatay kenni sigud a Marcos, Ilocos Norte Mayor Arsenio Agustin idi June 2017.
Innayon pay ni Layug, a malaksid iti droga ken gun for hire ket maipagarup a karaman pay ti grupo da Acosta iti pangholdap kadagiti Indian nationals idiay Umuna a Distrito ti La Union.
Immuna iti daytoy, napapatay dagiti pulis ni Acosta kalpasan a maipagarup a limmaban iti naisayangkat a buy-bust operation idiay Barangay Baroro idi rabii. (Abs Flores)
