(Update2) LA UNION – Maipagarup nga adda ti posibilidad nga addaan ti pakainaigan iti drug suspect a napapatay dagiti pulis iti naisayangkat a buy bust operation idiay ili ti Bacnotan ti nasarakan a bangkay idiay Barangay Nalvo Sur, ili ti Luna, La Union idi rabii.
Iti pannakiuman ti Bombo Radyo kenni S/Supt. Ricardo Layug Jr., provincial director ti La Union Police Provincial Office (LUPPO), kinunana a ‘vital’ wenno napateg iti agbalin a resulta ti imbestigasyon iti Scene of Crime Operatives (SOCO) iti nasao a kaso.
Sigun kenni Layug, ti nasarakan a bangkay idiay igid ti babay iti Luna ken nabigbig iti nagan a Romel Ison nga agnanaed idiay ili ti Bangar, La Union.
Agarup alas 9:30 idi rabii, August 6, 2018 ket nadiskobre dagiti residente ti bangkay ni Ison a nabalkot iti tape ti ulo ken napungngo pay dagiti sakana.
Kabayatan nga alas-9:00 idi rabii a napapatay ti drug suspek a ni Rodante Acosta gapu ta maipagarup a limmaban daytoy kadagiti pulis a nangisayangkat ti buy bust operation idiay Barangay Baroro, Bacnotan.
Sakbay ti insidente kinunana, ket immuna a naireport nga adda iti nangdukot kenni Ison idiay ili ti Bangar agarup alas-5:00 ti malem iti nasao met laeng nga aldaw.
Agparparang pay iti imbestigasyon a maipagarup nga agkaddua iti Ramos gun for hire group dagiti dua.
Ni Ison met iti tumaktakder a baro a lider iti grupo kalpasan a matay ti sigud a mangidadaulo kadakuada a ni Rizaldo Ramos.
Kinuna pay ni Layug, nga ikomparada dagiti nasarakan a basyo iti bala ti cal .45 a paltog asideg iti bangkay ni Ison ken iti cal .45 a paltog nga iggem ni Acosta.
Base iti intelligence report ti puliysa, maipagarup nga adda ti susik dagiti dua maipapan iti isyu ti bingay iti kwarta wenno panaglakkuan iti droga ken kayat ni Acosta a masolo iti ganansiya isu a nagmaymaysa a nagtignay daytoy a naglako iti shabu idi rabii.
Agpada met a nasampaan iti kaso a robbery dagiti dua gapu ti maipagarup a panangholdap iti Indian national idiay ili ti Luna ken agparparikot dagiti dua iti kwarta a pagpiyansa ti kaso a sangsanguenda.
Immuna iti daytoy, napapatay dagiti pulis ni Acosta kalpasan a maipagarup a limmaban daytoy iti naisayangkat a buy-bust operation idiay Barangay Baroro idi rabii.
Naala manipud ti salwadna iti siya a sachet a naglaon iti maatap a shabu, maysa a cal .45 a paltog ken buy bust money.
Karaman da Ison ken Acosta kadagiti suspek a maipagarup a nangpapatay iti kaddua a ni Reynard Mostales idi napalabas a bulan iti Hulyo idiay ili ti Santol, La Union.
Maipalagip a ni Mostales ket maysa met kadagiti maipagarup a suspek a nagpapaay kenni sigud a Marcos, Ilocos Norte Mayor Arsenio Agustin idi June 2017.
Posible a susik maipapan iti ayat wenno innagaw iti babae ken isyu iti bingay ti kwarta no apay a nagsisina iti Ramos group a nagbanag ti panagpipinnatay.
Malaksid iti droga ken panagbalin a gun for hire ket maipagarup a karaman ti grupo iti serye ti panangholdap idiay Una a Distrito ti La Union ken dumanonda pay idiay probinsya ti Ilocos Sur agingga idiay Ilocos Norte. (Absalom Flores)
