LA UNION – Matiktikaw ita dagiti mannursuro ken estudyante gapu iti makunkuna nga standoff ti dua a prinsipal a mangidadaulo iti La Union National High School (LUNHS).
Iti naangay a flag raising ceremony iti nadakamat a pagadalan itattay bigay ken inyanunsyo ni San Fernando City School Division Superintendent Fatima Boado a ni School Principal Merriam Obra-Aurello iti mangidaulo ita kasukat ni School Principal Madilyn Corpuz.
Iti pannakiuman ti Bombo Radyo kay Boado, kinunana nga ipatpatungpalna laeng iti pagannurutan ti (Department of Education (DepEd) a Circular No. 28-1962 ken pinasengkeddan iti Department Order No. 7-1999 gapu ta agkasapulan iti prinsipal dagiti dadduma pay a pagadalan iti masakupan daytoy a lugar isu a napasamak ti re-shaffle.
Inlawlawag ni Boado a kasapulan a maiyakar ni Corpuz gapu ta nasurok a lima a tawenen a mangidadaulo daytoy iti LUNHS ken kasapulan iti serbisyona kadagiti dadduma a pagadalan.
Immapela met ni Corpuz nga agtalinaed daytoy iti nadakamat a pagadalan gapu ta pito a bulan laengen ken agretiro daytoy iti serbisyo ken adda pay dagiti kayatna nga ilippas a proyekto ngem saan a pinaggan daytoy iti School Division Superentendent.
Sigun kenni Corpuz, kalpasan a napaay iti kadawatanna manipud iti opisina ti School Division Superentendent ket immasideg daytoy iti Civil Service Commission (CSC) kasaruno iti panangiruar iti status quo order isu a saan a pumanaw daytoy idiay LUNHS kabayatan a maad-adal ti apela.
Impaganetgetna nga isuna pay laeng iti nasken a bigbigen kas prinsipal iti pagadala uray no addan iti uneg ti maysa nga opisyal ti LUNHS ti dinutukan ni Boado.
