BR LA UNION – Ad-adalen ti Department of Agriculture (DA) iti panangibangon dagiti dadakkel a solar-powered ice plants tapno mataming ti nalabes a pannakadadael dagiti agricultural products.
Iti inisyal a plano, kinuna ni DA Sec. Francisco Laurel Jr. a ti Philippine Fisheries Development Authority ken ti Bureau of Fisheries and Aquatic Resources ket mabalinda ti mangilatang iti bukodda a pondo para kadagiti planta.
Segun iti sekretaryo, nangato ti ‘spoilage’ dagiti high value crops ditoy pagilian ket dumanon iti 35% agingga 40%.
Babaen kadagiti dadakkel a planta ti yelo, kinunana a mabalin a masuplayan dagiti talon manipud iti storage agingga iti merkado inton mailako dagitoy.
Iti sektor ti panagkalap, kinunana, dakkel a volume ti yelo ti mabalin nga usaren iti cold storage para kadagiti mangngalap nga agar-aramid iti deep-sea fishing.
Babaen iti daytoy, kinunana, a mabalin a dumanon iti pito nga aldaw wenno makalawas ti kinapresko dagiti lames.
Segun pay iti sekretaryo, posible pay a maibangon dagiti planta iti asideg dagiti komunidad nga adu ti mannalon ken mangngalap tapno maiyasideg ti serbisiyo kadakuada.
Kinunana a sigurado nga umadu ti matgedanda no addaanda iti umdas ken maitutop nga storage facilities tapno mapreserba dagiti produktoda ken maiturong kadagiti outlet nga addaan ti nangatngato a presyo.
Inaramid nga ehemplo ti sekretaryo ti masansan nga ar-aramiden dagiti mannalon a local selling wenno panaglako iti produktoda kadagiti bukodda a lokalidad tapno maliklikan ti pannakadadael.
Iti umno a pannakaidulin, kinunana a mabalinda pay nga ilako dagiti produkto iti sadinoman a lugar.
NATIONAL______DOJ – RECLUSION PERPETUA
headline: 5 akusado iti panagdukot ken panangpatay iti Korean national 11 tawenen iti napalabas, nakedngan ti reclusion perpetua – DOJ
Sinentensiyaan ti Manila Regional Trial Court (RTC) Branch 24 dagiti 5 nga akusado iti panangkidnap ken panangpapatay iti maysa a Koreano a babai, iti reclusion perpetua wenno tungpal biag a pannakaibalud, 11 a tawenen ti napalabas, segun iti Department of Justice (DOJ).
Maibasar iti 21 a pinanid a desisyon ti korte a nairuar idi Pebrero 18, napaneknekan a korte a guilty beyond reasonable doubt wenno nagbasol dagiti akusado nga isuda Ronel Mongado, Rowel Mongado, Alex Buenaobra, Jimmy Manlapaz ken Sergio Natad .
Imbilin pay ti korte kadagiti nasentensiyaan nga indibidual nga agbayad iti pamilya iti Korean national ti P100,000 tunggal maysa para iti moral damages, civil indemnity ken exemplary damages.
Immuna ti daytoy, segun iti DOJ, nagramot ti kaso idi Marso 3, 2014, idi nadukot dagiti akusado ti Korean national a ni Ji Won Lee kasukat ti ransom money manipud iti pamilya ti biktima.
Ngem nupay naipaay ti dagup a P17,000 kadagiti suspek, pinatayda latta ni Lee.
Kabayatanna, nasentensiyaan met iti kakunsabo dagiti suspek a ni Jullie-Ann Trabaco a nagserbi nga accessory iti krimen ket nasentensiyaan ti 5 agingga iti 8 a tawen a pannakaibalud.
Bayadanna pay ti P12,500 iti tunggal naulila ti biktima.
