BR LA UNION – Inyanunsiyo ti Philippine Air Force (PAF) ita nga aldaw, Marso 6, a narekobre dan iti “black box” wenno flight data recorder iti nagsuwek nga FA-50 jet fighter, iti kabakiran a paset ti Bukidnon idiay Northern Mindanao idi parbangon ti Martes, Marso 4.
Kinumpirma ni Air Force spokesperson Col. Ma. Consuelo Castillo a ti nasao a black box ket maipatulod kadagiti eksperto a mang-analisar iti napasamak sakbay a nagsuwek ti aircraft.
Karaman nga adalen dagiti eksperto iti usual flight data, altitude, airspeed, ken dadduma pay.
Segun kenni Castillo, ti nasao a black box ti mangdetermina iti flight path sakbay a nag-crash ken mangipaay ti valuable information kadagiti imbestigador, seknan iti isyu wenno karit a napasaran dagiti piloto kabayatan ti flight.
Kasaruno ti pannaka-diskubre iti lokasyon a nagsuwekan ti nagpukaw nga aircraft idiay Mount Kalatungan idiay Bukidnon idi Marso 5, impawil pay laeng ti PAF nga usaren dagiti nabatbati a 11 nga FA-50 jet fighters ti pagilian.
