Imbilin ni Presidente Ferdinand Marcos Jr iti Armed Forces of the Philippines ti madagdagos nga imbestigasyon ti panagsuwek ti maysa a FA-50 fighter jet sadiay Bukidnon a nakatayan ti dua a piloto.
Segun kenni Palace Press Officer USec. Claire Castro, kayat a maamwan ti Presidente nu anya ti rason ti panagsuwek ti supersonic aircraft.
Innayon met ni Usec Castro a napalaos ti panakiladingit ni Presidente Marcos kadagiti dua a piloto ti Philippine Air Force (PAF).
Iti agdama ket narugianen ti imbestigasyon, babaen metlaeng ti panangidaulo ti PAF mainaig ti pudno a napasamak ken nu apay a na ‘lost contact’ ti eroplano.
Maipalagip nga idi lunes ket naipadamag a mapukpukaw ti maysa a FA-50 fighter jet bayat a mangisaysayangkat ti Tactical night operations.
Kabayatanna, idi kalman met ket pinasingkedan ti Eastern Mindanao Command (Eastmincom) a nadakamat dan ti nagsuwekan dagiti fighter jet aircrafts ken pinasingkedan da pay iti bangkay ti dua a piloto a sakay dagitoy.
Inlawlawag ti Eastmincom nga awan met ti indikasyon a bimtak ti nasao nga aircraft.
Ti sabali a bangir ket inwaragawag met ti PAF a dakkel a pukaw kadakuada ti dagiti piloto ken supersonic aircraft.
