BR LA UNION – Nagballaag ni Department of National Defense (DND) Secretary Gilbert Teodoro nga aramiden dagiti kaalyado ti Pilipinas dagiti maitutop nga addang no padasen ti China ti mangipakat kadagiti restriksiyon iti nawaya a panaglayag iti mapagsusupiyatan a kabaybayan.
Iti report ti US news agency company nga Associated Press (AP), kinuna ti hepe ti DND a kinapudnona, ti kadakkelan nga external threat ket iti agresyon, expansionism ken panangpadas ti China a baliwan iti international law babaen ti panangusar iti puersa wenno panangbalbaliw iti urnos ti lubong a kontrolado da.
Ti nasao a waragawag ti sekretaryo ket kasaruno iti engkwentro dagiti eroplano ti China kontra kadagiti eroplano ti Pilipinas, Australia ken Amerika kadagiti contested waters.
Inlanad pay ti sekretaryo, a mangaramid ti Pilipinas ti kombinasyon nga addang agraman ti like-minded tapno labanan dagiti nasao a klase ti maniobra manipud China.
Kinunana a ti Pilipinas agraman dagiti kaalyadona ket nangaramid iti contingency measure a mangtaming kadagiti umasping nga insidente.
Nakabukel pay kunana iti Pilipinas agraman dagiti kaalyado na ti contingency measure tapno masungbatan iti kapada nga insidente.
