Kalpasan a maikkat iti pwesto, agtultuloy latta a makawaat ti proteksyon ni sigud a South Korean President Yoon Suk Yeol manipud iti Presidential Security Service (PSS).
Segun iti Presidential Security Act, isuna ken ti asawa na ket maipaayan ti seguridad ti las-ud ti lima a tawen agsipud ta ni Yoon ket naikkat a saanna pay napalpas ti termino na.
Karaman kadagiti maipaayan a seguridad ti sigud a Presidente ket ti panagpatrolya iti aglawlaw ti balay na ken panagprotekta tunggal agbiahe isuda, nu kasapulan.
Ni Yoon ket nagsapata kas presidente idi Mayo 2022 ket naikkat met iti puwesto idi laeng Biyernes kalpasan a patibkeren ti constitutional court iti impeachment nga insayangkat ti National Assembly gapo iti deklarasyon na ti martial law idi Disyembre, napalabas a tawen.
Kabayatanna, sumangsango pay ni Yoon iti naisina a kaso kriminal a rebelyon.
