Am-ammuen itan ti gobierno nu anya pay ti kasapulan a tulong dagiti lokal a gobierno ti Negros nga apektado ti panagbettak ti Bulkang Kanlaon.
Segun kenni Palace Press Officer Undersecretary Secretary Claire Castro, impasigurado Presidente Ferdinand Marcos Junior kadagiti maseknan nga ahensya ti gobierno a maikkan ti maiyannatop a tulong dagiti kailian iti nasao nga probinsya.
Panangipasiguro ni Castro, tutukan ti gobierno dagiti pagkasapulan dagiti lugar nga apektado iti agtultuloy a panag-alburoto iti bulkan.
Innayon pay ti Palace Press Officer a nakasaganan ti Office of the President a mangipaay ti kanayunan a pondo kadagiti lokal a gobierno.
Immun-una metten a nagkiddaw dagiti LGUs, partikular idiay La Castellana a nagkuna a kasapulan da ti pangtustos kas iti taraon, danum, hygiene kits, ken dadduma pay.
Kabayatanna, kinuna met ni Castro nga agtultuloy ti sebisyo ti Department of Social Welfare and Development kadagiti evacuees.
