Na-deport itan ditoy Pilipinas ti negosyante a wanted ti kaso a Murder a ni Alan Dennis Sytin.
Maibilang ni Sytin a mastermind iti pammapatay iti kabsat na a ni Dominic Sytin, presidente ken chief executive officer ti United Auctioneers Incorporated idi 2018 iti mays a hotel idiay Subic Bay Metropolitan Authority, Olongapo City, Zambales.
Nakasangpet ni Alan idiay Ninoy Aquino International Airport agarop alas-11:20 ti rabii idi Biyernes, Abril 11 nu sadino ket sinerbian isuna iti arrest warrant ti Police Regional Office-3 (PRO-3).
Impaulog ti Manila RTC Branch 7 ti nasao nga warrant idi Setyembre 1, 2020 para ti kaso a Murder ken awan pay ti inrekomendar ti korte nga piyansa para iti temporario a pannakawayawaya ti suspek.
Inawat ni Sytin ken kinadwa isuna ni Philippine National Police (PNP) spokesperson ken PRO-3 Director Police Brigadier General Jean Fajardo kasta met iti NAIA-Aviation Security Group ken San Fernando City Police Station.
Segun kenni Fajardo, ipakpakita daitoy a misyon a saan a matibag ti tarigagay ti PNP a maipatulog ti hustisya, aniaman a lugar ti nagtakasan dagiti kriminal.
Mangipakpakita pay daitoy kunana ti koordinasyon ti Royal Malaysia Police ken dagiti diplomatic representatives ti PH idiay Malaysia nga awan ti pugante iti makalibas ti law enforcement nu nagmaymaysa dagiti pagilian maibusor ti panangtaming kadagiti krimen.
Naikulong ni Sytin idiay Malaysia kalpasan a maarestar isuna idi Marso 22, 2025 babaen ti Special Investigation Branch ti Petaling Jaya District Police sadiay Cobra Rugby Club, Selangor gapo iti pannakapaay a makapresenta ti valid travel document kas panaglabsing met iti Immigration Act ti Malaysia.
Nakanselar pay ti Philippine passport na idi Setyembre 12, 2024 ken napaulogan ti Interpol Red Notice idi Enero 24, 2020.
