Saan a pinalubosan ti Manila Police District (MPD) dagiti nagduduma a grupo nga agprotesta asideg ti Mendiola.
Kasaruno daitoy ti pannakarambak ti Labor Day nu sadino ket ginasut nga indibidwal ti nakimapaysa iti tignay protesta.
Manipud Liwasang Bonifacio ken España, nagnagna dagiti nasao nga grupo agturong sadiay Mendiola, ngem idi nakabatog dan iti University of the East ket saan dagitoyen a napalubosan a sumrek iti barikada dagiti pulis.
Ipanpanawagan da ti panagngato ti suweldo a kunada ket nasken a dumanon ti P1,200 iti daily minimum wage.
Inlawlawag dagiti representante ti kada grupo a saan a talaga a kabaelan ti agdama a sweldo dagiti nguminngina a kangrunaan a magagatang.
Kiniddaw da ti gobierno nga agaramid kadagiti addang tapno maipangato ti kabibiag ti tunggal pamilya a Pilipino nu kasta ket mapukaw dan iti estado ti kinapanglaw.
