Kumpirmadon ti panagsali da sigud a Senadora Leila de Lima ken human rights lawyer Chel Diokno iti prosecution team ti Kamara para ti umadani nga impeachment trial kenni Vice President Sara Duterte. Sukatan ti dua dagiti maikkat a prosekusyon a naabak ti kallabes nga eleksyon.
Ni De Lima ket first nominee ti Mamayang Liberal (ML) party-list bayat a ni Diokno ket manipud met Akbayan. Segun iti partial and unofficial results, mangidadaulo ti Akbayan iti party-list race nga addaan ti 2.8-M a botos. Nakastrek met ti top 63 iti ML, isu a posible a makaala met daitoy iti tugaw para ti 20th Congress. Agpada dagitoy nga agsapata inton bulan ti Hulyo.
Segun kenni House Speaker Martin Romualdez, mainaig ti confidential funds ni VP Sara ti pannakisalip da De Lima ken Diokno iti prosekusyon – a mangitugot met ti “credibilidad, balanse, ken pakaigapuan” ti impeachment process.
Inawat da De Lima ken Diokno ti naidiaya kadakuada kas paset ti adbokasiya para ti kinapudno, pagsungbatan, ken hustisya. Kinunada a daitoy ket trabaho ti konsensiya ken saan a mainaig iti pulitika, nu di ket panagsurot iti Konstitusyon.
Kinuna met ni Diokno, kas kangrunaan a nangipila para ti first complaint ti impeachment, sibubukel ti suporta na iti agbalin nga proseso nga addaan iti pagsungbatan.
Maipalagip a na-impeach ni VP Duterte idi Pebrero gapo kadagiti alegasyon a graft, bribery, ken betrayal of public trust. Segun iti Kamara, 80% kadagiti ebidensya a maipasango ti Senado ket nakasaganan.
Manamnama a mangrugi ti panagdengngeg inton Hunyo 30, kasaruno ti panagsapata dagiti baro a nabotosan a senador.
Tapno masentensyaan ni Duterte, kasapulan ti saan a bumaba ti 16 a botos manipud kadagiti 24 a senador. Nu mapaneknekan a guilty, maikkat isuna ti puwesto ken ma-disqualify ti aniaman a public office — karaman ti panggep na a tumaray kas Presidente inton 2028.
