BR LA UNION – Nangiruaren ti warrant of arrest iti Angeles City Regional Trial Court Branch 118 kontra kenni sigud a presidential spokesperson Atty. Harry Roque ken kontrobersyal a Chinese businessman a ni Cassandra Lie Ong ken siyam pay a dadduma nga indibidwal.
Adda pakainaiganna daytoy iti kaso a qualified human trafficking nga indatag ti gobyerno kadakuada.
Immuna a naakusaran dagiti nadakamat a personalidad iti maipagarop nga ilegal nga operasyon iti rinaut a Lucky South 99 idiay Porac, Pampanga iti panagtinnulong ti PNP ken PAOCC.
Iti nasao a kaso, awan ti nairekomenda a piyansa para iti temporaryo a wayawaya dagiti akusado.
Awan pay ti opisyal a waragawag iti kampo ni Roque ken Ong seknan ti daytoy.
Maibasar iti kauddian nga impormasyon, ni Roque ket maipagarop nga adda idiay The Hague, Netherlands ken maipalagip a nag-apply sadiay ti political asylum bayat a ni Ong ket agdama a naka detain ditoy Pilipinas.
Immunan nga imbaga ni Roque a nakasagana a sumango kadagiti kaso na ditoy pagilian iti kanito nga adda mairuar nga arrest warrant kenkuana.
