Nagkakadwa dagiti anak ni sigud a Presidente Rodrigo Duterte para ti maysa a Thanksgiving gathering nga inbinglay ni Davao City 1st District Representative Paolo “Pulong” Duterte iti social media page na.
Makita iti ladawan a kadwa na isuda Vice President Sara Duterte ken Davao City Mayor Sebastian Duterte. Inbinglay met ni Veronica “Kitty” Duterte ti nasao a ladawan iti bukod na a social media account.
Segun kenni Representative Duterte, ti panagkakadwa da ket panagyaman kadagiti karit a sangsangwen iti pamilya da.
Kabayatanna, agtaltalinaed iti kustodiya ti International Criminal Court (ICC) sadiay The Hague, Netherlands ni sigud a Presidente Duterte gapo iti crimes against humanity mainaig iti nadara a kampanya kontra droga nga Oplan Tokhang.
Segun met iti datos, nasurok 6K ti pimmusay iti nasao a kampanya ngem mapatta-patta a dumanon pay ti 20K ti bilang segun kadagiti human rights groups.
Iti napalabas a 2025 midterm elections, simrek manen iti lokal a politika ti pamilya Duterte nu sadino ket nangabak ni FPRRD kas Mayor ti Davao City bayat a ni Sebastian ket nangabak kas Vice Mayor, ken ni Paolo Duterte ket nabotosan manen kas mangibagi ti umuna a distrito ti Davao.
