Nangisayangkat ti damo a direkta a panagtaripnong dagiti negotiator i nagbaetan ti Ukraine ken Russia idi Biernes idiay Istanbul.
Daitoy ket kalpasan ti nasurok tallo a tawen manipud idi nangrugi ti gyera ti dua a pagilian.
Ti nasao a negosasyon ket naangay sadiay Dolmabahce Palace idiay Bosphorus ken maysa a met a senyales ti diplomatic progress ti nagsinnumbangir a dasig a saan pay a pormal a nagsangsango sipud pay idi Marso 2022.
Impatulod ti Estados Unidos, maysa kadagiti nakiballaet, ni US State Department director of policy planning Michael Anton tapno mangibagi ti pagilian da.
Iti biang met ti Ukraine, impatulod ni President Volodymyr Zelensky ti bunggoy da nga indauloan ni Defense Minister Rustem Umerov kadwa iti deputy heads of Ukraine Intelligence services, deputy chief ti military general staff, ken deputy foreign minister.
Indauloan met ti delegasyon ti Russia ni Kremlin aide Vladimir Medinsky karaman iti deputy defense minister, deputy foreign minister, ken head ti military intelligence.
Segun iti Turkish Foreign Ministry, naisayangkat ti trilateral meeting ti baetan dagiti opisyales ti Turkey, Estados Unidos, ken Ukraine pakairamanan ni US Secretary of State Marco Rubio idi alas-3:45 ti malem di kalman, oras ditoy Pilipinas.
Napasarunuan pay daitoy ti panagtaripnong dagiti delegasyon ti Russia ken Ukraine kakadwa met dagiti opisyales ti US ken Turkey, alas-5:30 ti malem, ti kapada nga aldaw.
Nupay kasta nababa met ti manamnama a breakthrough iti Ukraine peace talks kalpasan nga immunan nga imbatad ni US President Donald Trump nga awan ti progreso agingga saan da nga agpatang ni Russian President Vladimir Putin.
