Indeklara ti World Health Organization (WHO) ti polio outbreak idiay Papua New Guinea ken nagpanawagan da ti madagdagos a panagbakuna kontra iti sakit.
Natakuatan iti virus kadagiti dua nga ubbing nga asymptomatic idiay ili ti Lae babaen ti routine screening.
Segun iti WHO, nababa ti lebel ti panagbakuna ti nasao a pagilian, nababbaba pay ngem kagudwa iti kadagiti populasyon kontra polio.
Impakdaar ni WHO representative Dr. Sevil Huseynova, kasapulan a magun-od iti 100% coverage iti kabiitan a panawen nangruna ta mabalin nga agwaras ti sakit kadagiti dadduma pay a pagilian ket innayon na pay a “Polio knows no borders.”
Kabayatanna, target met ti gobierno ti Papua New Guinea a mabakunaan amin nga agtawen ti sangapulo agpababa ita a tawen, a mapatta-patta a dumanon ti agingga 3.5 milyon a tattao.
Makabinnulig ti Papua New Guinea iti WHO, UNICEF, ken gobierno ti Australia iti panagtaming ti polio.
Mapalagip a naideklaran kas polio-free iti nasao a pagilian idi tawen 2000 ngem naaddaan manen ti outbreak idi tawen 2018 a dagos met a nalapdan. Naipadamag a ti baro a strain ti virus ket addaan genetic link iti strain a natakuatan idiay Indonesia.
Iti agdama, agtultuloy met ti mapadapdasan a polio outbreaks ti sumagmamano a pagilian ti Asia kas idiay Pakistan ken Afghanistan bayat nga adda met ti posible nga outbreak a mapadasan idiay Gaza.
