BR LA UNION – Opisyalen a naiproklama dagiti senador a nangabak iti May 12 national and local elections, ita nga aldaw ti Sabado, May 17.
Indaulwan ti Commission on Elections iti proklamasyon dagiti 12 a senador ngem saan a nakadar-ay ni Sen. Kiko Pangilinan agsipudta dinar-ayanna ti graduation ti anak na idiay Amerika.
Iti naisayangkat a seremoniya, tunggal senador ket naipaayan ti gundaway tapno makaited ti sumagmamano a minuto a mensahe.
Kabayatanna, rinaem ni Comelec Chairman George Erwin Garcia iti napintas a turnout iti nasao nga eleksiyon.
Segun kenni Garcia, dagiti agtutubo a botante iti kangrunaan ken aktibo a nakipaset iti nasao nga eleksiyon.
Impaganetget ti Comelec chair a nabileg iti suporta nga impakita dagiti agtutubo nangruna ket dackel a porsyento ti bilang da, dackel a banag a mangdiktar nu siasino iti sumaruno a lider ti pagilian.
Siniguro ni Garcia a nagbalin a naurnos ken nadalus iti pakabuklan nga eleksiyon, laksid ti panagdudua ti sumagmamano iti timpuar a naduma-duma nga isyu kas ti overvote, ken dadduma pay.
Nupay saan a perpekto kunana ti 2025 elections, maragsakan ti opisyal nga iti pakabuklan ket naipatungpal ti eleksiyon nga awan ti major issue wenno dadackel a problema.
Iti maudi a paset ti mensahe ti Comelec Chairman sakbay iti proklamasyon, nangibati ti apela kadagiti senador a mangputar ti linteg a mang-reporma iti pagsayaatan ti sumaruno nga eleksiyon.
