Imbilin ti Sandiganbayan ti pannaka-release dagiti sequestered assets a mabalin nga adda iti kustodiya paylaeng iti gobierno a kukua ti pimmusay a ni Benjamin “Kokoy” Romualdez, kabsat ni sigud a First Lady Imelda Marcos.
Segun iti resolusyon ti Sandiganbayan 6th Division, ti addang ket maibasar ti mosyon ti Trans Middle East (Phils.) Equities ken Incorporated (TMEPEI) a kummiddaw iti korte, Presidential Commission on Good Government (PCGG), ken dadduma pay nga ahensya a mairuaren dagiti sanikua, karaman dagiti shares kadagiti banko kasta met dagiti dividends ken interes a kakuyog daitoy.
Ti desisyon ti korte ket gapo iti maysa pay a desisyon idi laeng Marso 2025 karaman payen ti resolusyon ti 5th Division idi tawen 2003 a nagdeklara ti ‘null and void’ iti Sequestration Order No. 86 0056 a nairuar idi pay tawen 1986.
Nupay kasta, saan met nga imbilin ti korte ti madagdagos a pannakaited dagiti shares ti TMEPEI, nu ketdi ket naipastrek laeng daitoy sadiay Land Bank of the Philippines kas escrow.
Maipalagip a nagpetisyon iti TMEPEI idi tawen 2022 sadiay Korte Suprema a nagkuna nga awan met iti basaran ti agtultuloy a panangilemmeng kadagiti shares.
Indatag ti Supreme Court a ti Sandiganbayan ket naaddaan iti “grave abuse of discretion” iti agtultuloy a panagkontrol kadagiti sanikua.
Manipud met iti kauddian a desisyon, binilin ti 6th Division ti Sandiganbayan ti pannaka-release dagiti assets, nupay saan pay a madakamat ti eksakto a gatad a nasken a maisubli kadagiti Romualdez.
Nabilin payen iti PCGG, banko, ken dadduma pay a partido a mangisubmitir ti report mainaig iti release dagiti sanikua iti uneg ti 15 nga aldaw.
