Nakatudingen a mangipila kadagiti kriminal ken administratibo a kaso ti Department of Migrant Workers (DMW) kontra kenni sigud nga Overseas Workers Welfare Administration (OWWA) Chief Arnell Ignacio.
Gapo paylaeng daitoy iti maanomalya a land acquisition deal babaen ti liderato ni Ignacio a napagammoan a saan a immalan ti usto a proseso ken awanan pay ti proper authorization.
Segun kenni Migrant Workers Secretary Hans Leo Cacdac, saan laeng a ni Ignacio ti agsungbat iti linteg nu di ket karaman pay dagiti sumagmamano nga OWWA Officers a karaman ti transaksyon.
Naikkat kas OWWA Chief ni Ignacio gapo iti mapagduaduaan a transaksyon a nangigubuay ti ‘loss of trust and confidence’ ti DMW officers ken Board of Trustees a nakailista kadagiti innem a panaglabsing.
Sumagmamano kadagiti panaglabsing a nailista ket ti saan nga otorisado a panagusar ti P2.4-B nga emergency repatriation funds a na-convert kas capital outlay, karaman pay ti panagpirma iti deed of sale ti property ken ti panagtultuloy ti transaksyon nga awanan ti board clearance.
Napagammoan nga adda dagiti sabali nga acquisition deal kadagiti undisclosed lease contracts, post-sale rental collections, ken ti pannakapaay ti OWWA a maaddaan iti full ownership iti nagatang a property laksid a fully paid metten ti transaksyon.
Kabayatanna, nagsapata met ti sekretaryo a papigsaen da pay ti pannakaipatungpal ti transparency ken clean governance tapno lalo pay nga agtalek iti tao iti serbisyo ti ahensya kasta met dagiti attached agencies da para kadagiti Overseas Filipino Workers (OFWs).
Impaganetget ni Cacdac ti kinapateg ti integridad ken transparency iti serbisyo publiko, partikular iti panangsalaknib ti baknang ti pagilian.
