Impadamag ti Davao City Health Office idi Biernes, Mayo 30, nga adda ti innem a kaso ti monkeypox ti ciudad a nangrugi idi bulan ti Abril, karaman dagiti dua a kaso idi napalabas a bulan, nu sadino ket maysa ti natay gapo iti komplikasyon.
Segun kenni Dra. Sofia Corazon Zafra, dagiti nabatbati a pasyente ket agtultuloy iti monitoring da ken adda da amin itan ti natalged a kasasaad, karaman ditan dagiti close contacts da nga agingga ita ket puro amin asymptomatic.
Laksid iti kabaroan a kaso, saan pay a naipatungpal ti mandatoryo a panagsuot ti face mask sadiay Davao City, saan a kas iti allagaden kadagiti kabangibang na a lugar kas iti Davao del Sur, ken Compostela, Davao de Oro.
Maipalagip a nag-viral ti video ti content creator a ni Cornelius Corsame nu sadino ket pila-pila dagiti tattao a gumatang ti face mask idiay Uyanguren, Davao City. Kaadwan met kadagiti gumatgatang ket suppliers a talaga a panggep nga agilako ti facemask bayat a dagiti dadduma met ket para ti personal a proteksyon.
Inlawlawag ti City Health Office a saana kasapulan nga ag-panic wenno mangidulin kadagiti face masks agsipud ta ti monkeypox ket saan met nga airborne – magun-od laegng daitoy babaen ti close physical contact ti kudil.
Nupay kasta ket pinaregta ni Dra. Zafra iti publiko a mabalin latta nga agisuot ti face mask kas kanayunan a proteksyon nangruna ita a panagtutudo ken agraraira ti sakit a trangkaso.
