Kiniddaw ti Office of the Civil Defense (OCD) kenni Presidente Ferdinand Marcos Jr. a mangideklaran ti state of calamity sadiay Eastern Visayas (Region 8) gapo iti agtultuloy a lugi iti ekonomiya gapo paylaeng ti load restrictions ti San Juanico Bridge.
Segun kenni OCD spokesperson Director Chris Noel Bendijo, mapapartak ti release ti pondo nu maipatungpal ti state of calamity iti rehiyon kasta met iti rehabilitasyon ti rangtay.
Maipalagip a naipaserra ti San Juanico Bridge kadagiti motorista kalpasan a mangipatungpal ti Department of Public Works and Highways (DPWH) ti tallo a tonelada a weight limit idi Mayo 14 gapo iti kinadaan ti rangtay. Gapo iti daitoy ket naideklara ti state of emergency para ti intero a probinsya ti Samar.
Segun iti panagadal dagiti inhinyero, nakita da ti nalawa a panaglati, deformed steel members, ken dadael a koneksyon. Nagduduma ita dagiti naiyemplementar nga addang, pakairamanan ti panangiawil kadagiti nadadagsen a kargamento, one-way traffic, panangipatulod kadagiti barge para kadagiti bagahe.
Ti load limit iti nangigubuay ti pannaka-stranded dagiti nasurok 200 a lugan a mapatta-patta a nangipaayen ti P300-M agingga P600-M a binulan a pannakalugi ti ekonomiya.
Kabayatanna, ti DPWH met ti mangidiktar nu mano a kasapulan a pondo ti rehabilitasyon ken iti OCD iti mangadal ken mangisubmitir sadiay National Disaster Risk Reduction and Management Counsil (NDRRMC) sakbay a maiturong ti Office of the President.
Nakikoordinaren ti OCD iti Department of Trade and Industry (DTI) para iti price freeze kadagiti kangrunaan a magagatang tapno makontrol iti presyo iti kangitingitan ti manmnama a disruptions ti supply chain.
