BR LA UNION – Mamati ni sigud a Senador ken Congressman elect Leila de Lima a mailabasing iti 1987 Constitution iti addang ni Senate President Francis Escudero nga itantan iti panangtalantan ti impeachment articles kontra kenni Vice President Sara Duterte.
Segun kenni De Lima, nalawag iti Article XI, Section 3(4) ti Konstitusyon a nu adda ti verified impeachment complaint a pirmado ti saan a bumaba iti one-third kadagiti miyembro ti Kamara de Representates, rumbeng a dagus a rugyan ti Senado iti panagusig.
Maipalagip a ti impeachment complaint kenni VP Duterte ket nakagun-od ti 215 a pirma kadagiti kongresista — limbes iti makidkiddaw a one-third ti Kamara.
Immuna ti daytoy, intantan ni Escudero iti presentation ti impeachment articles manipud Hunyo 2 (a panaglukat ti sesyon) inton Hunyo 11.
Impaganetget ni De Lima, iti panagusig ket saan nga opsyonal, nudiket obligado ti Senado nga aggunay kas impeachment court.
Immunan a pinatulodan ni Escudero ti imbitasyon iti Kamara idi Mayo 23 tapno rugyan ti proseso inton Hunyo 2, ngem kellaat a nagpatulod iti baro a surat idi napan a lawas tapno itantan daytoy.
Kabayatanna, adda panagdudua ita ti sumagmamano a legal experts a posible a maapektaran iti legalidad ti proseso nu iti 20th Congress ti mangiggem ti impeachment a naidatag iti sidong ti 19th Congress.
Ngem segun kenni De Lima, kas dagiti regional trial court, mabalin nga agbaliw iti komposisyon ti impeachment court, ngem saan a mapukaw iti hurisdiksyon.
