Nakatuding manen a sumango ti korte ni sigud a Negros Oriental Representative Arnolfo ‘Arnie’ Teves Jr. mainaig paylaeng dagiti nagtutuon a kaso na sipud iti naarestar daitoy idiay Timor-Leste ken mapasubli ditoy Pilipinas.
Naka-schedule ti arraignment wenno panagbasa ti sentensya ti sigud a mamanday-linteg inton sumaruno a lawas wenno inton Hunyo 10.
Inlawlawag mismo daitoy ti abogado na a ni Atty. Ferdinand Topacio ken impeksa na met ti kinasagana da a mangidepensa ti kliyente da para kadagiti akusasyon a nakasagmakan na. Ti baro nga schedule ti hearing ket maangay sadiay Manila Regional Trial Court Branch 51 iti eksakto alas dos ti malem.
Mainaig paylaeng daitoy ti kaso ni Arnie Teves Jr. a pammapatay kenni Negros Oriental Governor Roel Degamo ken kadagiti dadduma pay a biktima idi tawen 2023. Innayon pay ti legal counsel na iti panagtungpal ti korte apaman kiddawen da a dumar-ay a personal ti sigud a kongresista.
Maipalagip nga idi kallabes ket adda iti impaulog a mosyon ti kampo ni Teves nga aramiden a video conference laengen ti panagdar-ay na kadagiti arraignments. Daitoy ket para metten iti seguridad ken ti biag ti kliyente da.
Inlawlawawag pay ni Atty. Ferdinand Topacio a ti kastoy a klase ti panagdar-ay ket saan met a maiparit ken mabalin a palubosan ti hukom nu kiddawen da.
Ti sabali a bangir ket pinasingkedan met ni National Bureau of Investigation Chief Jaime B. Santiago a saanen a sumango pay a personal ti sigud a kongresista para ti panagdengngeg ti kaso na nu di ket babaen lattan ti video conference.
Kabayatanna, manamnama met nga ipresentar na ti bagbagi na para ti panagbasa ti sentensya para ti umay a Martes, Hunyo 10, 2025.
