Nagpanawagan ti Commission on Human Rights (CHR) kadagiti baro a nabotosan a mamanday-linteg iti 20th Congress nga ikkan ti prayoridad ti pannakaipasa dagiti dua a singasing a linteg a panggep nga itandudo ti karbengan dagiti babakla ken tomboy a paset ti LGBTQIA+ community, kasaruno ti panagrambak ti pride month ita a bulan ti Hunyo.
Impaganetget pay ti CHR ti kinapateg ti sexual orientation, gender identity, gender expression, wenno sex characteristics (SOGIESC) equality bill ken ti comprehensive anti-discrimination bill (CADB) kas sungbat ti agtultuloy a diskriminasyon ken saan a patas a mapadpadasan ti LGBTQIA+ sector ditoy Pilipinas.
Napagammoan a nabayagen a nakabinbin sadiay Kongreso ti SOGIE ken anti-discrimination bills a kadawyan ket maharharang gapo iti panagkontra dagiti konserbatibo ken relihiyoso a grupo.
Maipalagip nga idi tawen 2022 ket naaprobaranen ti Senate Committee on Women babaen ti panangidaulo ni Senador Risa Hontiveros ti maysa a bersyon ti SOGIE bill ngem saan met daitoy a nakaabante. Iti dayta a kanito ket inakusaran pay ni Hontiveros ti maysa a pada na a senador iti panagharang ti gakat.
Mangnamnama ita ti CHR a dagiti baro a mamanday-linteg ket mangirugi ti inklusibong a perpektibo ken ipasa dagiti linteg a nagtaud iti prinsipyo ti karbengan pantao, patas, ken addaan ti hustisya.
