Agtultuloy a makikokoordinar kadagiti coastal barangays ken kadagiti mangngalap ti Philippine Drug Enforcement Agency (PDEA) idiay Pangasinan kalpasan a matakuatan dagiti pito a sako ti mapapati nga ilegal a droga a tumtumpaw ti kabaybayan a sakopen ti probinsya.
Dagiti sako ket nakita dagiti mangngalap a naglaon ti shabu ken mapatta-patta nga aggatad daitoy ti agingga nasurok maysa a bilyon a pisos.
Segun kenni Police Captain Rowell C. Isit, hepe ti PNP Drug Enforcement Group idiay Pangasinan, kadwa da ti PDEA, Philippine Navy, ken dadduma pay nga ahensya ti gobierno tapno irekobre dagiti nasao a maiparit nga agas.
Inalarma da met ti kapulisan dagiti coastal municipalities ti Pangasinan nga agbalin nga strikto ti panagbantay kasaruno dagiti serye pay ti mataktakuatan a kapada nga sako kadagiti ili ti Bolinao ken Agno.
