Inlawlawag ti Duterte Youth party-list a ti panagaramat da ti sabali nga apelyido ti 1st nominee da a ni Drixie Cardema ket para iti name recall.
Dinepensaan ni Ronald Cardema, Chairman ti Duterte Youth dagiti alegasyon kenni Drixie babaen ti panagusar ti sabali nga apelyido iti Certificate of Nominations and Acceptance ti 2025 Midterm Elections.
Segun iti imbestigasyon, ti pudno a nagan ti Duterte Youth nominee ket Drixie Mae Suarez a saan nga Cardema, nu sadino ket kabsat isuna ti asawa ni Ronald Cardema wenno hipag na daitoy.
Kinuna met ni Cardema nga amin a kongresista ken senador ket pormal a kummiddaw iti Kamara ken Senado kadagit political names a kayat da a mausar para ti pakabuklan a termino da agsipud ta ti “name recall” ket napateg para ti politiko.
Para met iti biang ti Law Department ti Commission on Elections (COMELEC), nakatuding dan a mangipaulog ti motu proprio show cause order kontra it nominado ti Duterte Youth. Inlawlawag ni COMELEC Chairman George Erwin Garcia a saan a maapektaran ti nominasyon ken ti posible a proklamasyon ni Drixie agsipud ta awan pay met ti pormal a petisyon nga insubmitir para ti panagkanselar ti nominasyon na.
Segun pay kenni Garcia, adalen pay ti poll body dagiti opisyal a dokumento nga insubmitir ni Drixie idi nangipila isuna ti kandidatura kasta metten ti kadagiti sigud a records na.
Maipalagip a nag numero dos ti Duterte Youth iti party-list race idi midterm elections a nakagun-od ti 2.3M a botos. Nupay kasta, intantan met ti COMELEC – nga agtugtugaw kas National Board of Canvassers – ti proklamasyon da gapo iti agur-uray a kaso.
